Berriak | 2013-10-10

Nerbioi ibaiaren ur-bazterreko birsorkuntza jardunaldia Arakaldon

Udaltalde 21 Nerbioi-Ibaizabalek jakinarazten du datorren larunbatean, urriaren 19an, Nerbioi ibaiaren ur-bazterreko birsorkuntza jardunaldia burutuko dela Arakaldon. Oraingoan, flora exotiko inbaditzailea kentzeaz gain bertako espezieak landatuko dira.

Hitzordua 9:30tan da Usilarra parajean, Arakaldoko tren geltoki ondoan (Muebles Gorostidi). Parte-hartzea zabala da eta interesa duen edozein boluntariori zuzendua dago. 3 ordutako ekintza aurreikusten da eta arropa eta zapata erosoak eramatea gomendatzen da. Jarduera amaitzean, informazio eta sentsibilizaziorako kartel bat jarriko da bertan.

Ekintza hau “Nerbioi-Ibaizabal eskualdeko hots, Arakaldo, Arrankudiaga, Arrigorriaga, Basauri, Etxebarri, Galdakao, Orozko, Orduña, Ugao-Miraballes, Zaratamo eta Zeberioko udalerrietako ibai eta erreketan, biodibertsitatea hobetzeko eta degradatutako ibaiertzetako berriztapen ekologikoa gauzatzeko” proiektuari lotua dago.

Jardueran, Nerbioi ibaiertzean dauden Cortaderia selloana, Arundo donax, Artemisia verlotiorum bezalako espezie exotiko inbaditzaileak kenduko dira. Jarduera horren bitartez, tokiko espezieak berez haztea ahalbidetuko da, biodibertsitatearen eta haltza, sahatsa edo intsusa bezalako bertoko ibaiertzeko espezieen galera etengo da, eta faunarentzat babesgarriago eta naturalagoa den paisaia sortuko da. Halaber, bertako espezie autoktonoak landatuko dira eta ingurua garbitu eta zabor bilketa egingo da.

Ekintza hasi aurretik, aholkularitza teknikoaren arduradunek azalpen bat emango dute jardueraren ezaugarriak eta metodologia ezagutzeko. Ingurunearen balio ekologikoaren garrantzia ere azpimarratuko da eta espezie exotiko inbaditzaileek sortzen dituzten arriskuen inguruan ere hitz egingo da.

Degradatutako ibaiertzak berreskuratzeko, eskualde mailan egiten den bederatzigarren jarduera da Arakaldoko hau. Hurrengo ekintza, azaroak 5ean izango da Basaurin.

Proiektu honek Eusko Jaurlaritzako Ingurumen eta Lurralde Politika Saileko diru-laguntza jaso du.

Informazio gehiago:http://www.ut21.org/noticias_mas-e.php?id=386; udaltalde21@ut21.org  edo 94 671 26 99 

• Itzuli

Jasangarritasun Bulegoa Tokiko Agenda 21 Agenda 21 Industriala

Eskolako Agenda 21 Hondakinen kudeaketa

Mugikortasun iraunkorra
      

© Udaltalde 21 Nerbioi Ibaizabal • info@udaltalde21.eus • Tel. 946712699 • Elexalde 18. 48498 Arrankudiaga-Zollo